“Cattārome, bhikkhave, puggalā santo saṃvijjamānā lokasmiṃ. Katame cattāro? Rūpappamāṇo rūpappasanno, ghosappamāṇo ghosappasanno, lūkhappamāṇo lūkhappasanno, dhammappamāṇo dhammappasanno— ime kho, bhikkhave, cattāro puggalā santo saṃvijjamānā lokasminti.

VAR: ca rūpe pamāṇiṃsu → ye ca rūpena pāmiṃsu (bj, s1-3, km, pts1)

Ye ca rūpe pamāṇiṃsu,
ye ca ghosena anvagū;
Chandarāgavasūpetā,

VAR: nābhijānanti te janā → na te jānanti taṃ janaṃ (bj, pts1) | na te jānanti tañjanaṃ (s1-3, km)

nābhijānanti te janā.

Ajjhattañca na jānāti,
bahiddhā ca na passati;
Samantāvaraṇo bālo,
sa ve ghosena vuyhati.

Ajjhattañca na jānāti,
bahiddhā ca vipassati;
Bahiddhā phaladassāvī,
sopi ghosena vuyhati.

Ajjhattañca pajānāti,
bahiddhā ca vipassati;
Vinīvaraṇadassāvī,
na so ghosena vuyhatī”ti.

Pañcamaṃ.