Aṅguttara Nikāya 5
21. Kimilavagga
208. Dantakaṭṭhasutta
“Pañcime, bhikkhave, ādīnavā dantakaṭṭhassa akhādane. Katame pañca?
VAR: pariyonandhati → pariyonaddhati (s1-3, km, mr) | pariyonaddhanti (pts1)
Acakkhussaṃ, mukhaṃ duggandhaṃ hoti, rasaharaṇiyo na visujjhanti, pittaṃ semhaṃ bhattaṃ pariyonandhati, bhattamassa nacchādeti. Ime kho, bhikkhave, pañca ādīnavā dantakaṭṭhassa akhādane.
Pañcime, bhikkhave, ānisaṃsā dantakaṭṭhassa khādane. Katame pañca? Cakkhussaṃ, mukhaṃ na duggandhaṃ hoti, rasaharaṇiyo visujjhanti, pittaṃ semhaṃ bhattaṃ na pariyonandhati, bhattamassa chādeti. Ime kho, bhikkhave, pañca ānisaṃsā dantakaṭṭhassa khādane”ti.
Aṭṭhamaṃ.