Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarissā upāsikāya sānu nāma putto yakkhena gahito hoti. Atha kho sā upāsikā paridevamānā tāyaṃ velāyaṃ imā gāthāyo abhāsi:

“Cātuddasiṃ pañcadasiṃ,
yā ca pakkhassa aṭṭhamī;
Pāṭihāriyapakkhañca,
aṭṭhaṅgasusamāgataṃ.

Uposathaṃ upavasanti,
brahmacariyaṃ caranti ye;
Na tehi yakkhā kīḷanti,
iti me arahataṃ sutaṃ;
Sā dāni ajja passāmi,
yakkhā kīḷanti sānunā”ti.

“Cātuddasiṃ pañcadasiṃ,
yā ca pakkhassa aṭṭhamī;
Pāṭihāriyapakkhañca,
aṭṭhaṅgasusamāgataṃ;

Uposathaṃ upavasanti,
brahmacariyaṃ caranti ye.
Na tehi yakkhā kīḷanti,
sāhu te arahataṃ sutaṃ;

Sānuṃ pabuddhaṃ vajjāsi,
yakkhānaṃ vacanaṃ idaṃ;
Mākāsi pāpakaṃ kammaṃ,
āvi vā yadi vā raho.

VAR: Sace ca → yañceva (bj) | saceva (s1-3, km, pts1, mr)

Sace ca pāpakaṃ kammaṃ,
karissasi karosi vā;
Na te dukkhā pamutyatthi,
uppaccāpi palāyato”ti.

“Mataṃ vā amma rodanti,
yo vā jīvaṃ na dissati;
Jīvantaṃ amma passantī,
kasmā maṃ amma rodasī”ti.

“Mataṃ vā putta rodanti,
yo vā jīvaṃ na dissati;
Yo ca kāme cajitvāna,
punarāgacchate idha;
Taṃ vāpi putta rodanti,
puna jīvaṃ mato hi so.

Kukkuḷā ubbhato tāta,

VAR: kukkuḷaṃ → kukkulā (si) | kukkulaṃ (s3)

kukkuḷaṃ patitumicchasi;
Narakā ubbhato tāta,
narakaṃ patitumicchasi.

Abhidhāvatha bhaddante,
kassa ujjhāpayāmase;

VAR: nīhataṃ → nīhaṭaṃ (bj) | nibbhataṃ (s1-3, km, mr) | nibhataṃ (pts1, mr)

Ādittā nīhataṃ bhaṇḍaṃ,
puna ḍayhitumicchasī”ti.