Saṃyutta Nikāya 35
1. Aniccavagga
VAR: 12. Bāhirānattātītānāgatasutta → dutiyabāhirānattasuttaṃ (bj) | anattā 4; bāhiraṃ (pts1)
12. Bāhirānattātītānāgatasutta
“Rūpā, bhikkhave, anattā atītānāgatā; ko pana vādo paccuppannānaṃ. Evaṃ passaṃ, bhikkhave, sutavā ariyasāvako atītesu rūpesu anapekkho hoti; anāgate rūpe nābhinandati; paccuppannānaṃ rūpānaṃ nibbidāya virāgāya nirodhāya paṭipanno hoti. Saddā … gandhā … rasā … phoṭṭhabbā … dhammā anattā atītānāgatā; ko pana vādo paccuppannānaṃ. Evaṃ passaṃ, bhikkhave, sutavā ariyasāvako atītesu dhammesu anapekkho hoti; anāgate dhamme nābhinandati; paccuppannānaṃ dhammānaṃ nibbidāya virāgāya nirodhāya paṭipanno hotī”ti.
Dvādasamaṃ.
Aniccavaggo paṭhamo.
Aniccaṃ dukkhaṃ anattā ca,
tayo ajjhattabāhirā;
Yadaniccena tayo vuttā,
te te ajjhattabāhirāti.