Saṃyutta Nikāya 35
1. Aniccavagga
VAR: 2. Ajjhattadukkhasutta → dukkhaṃ 1; ajjhattaṃ (pts1)
2. Ajjhattadukkhasutta
“Cakkhuṃ, bhikkhave, dukkhaṃ. Yaṃ dukkhaṃ tadanattā; yadanattā taṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Sotaṃ dukkhaṃ … pe … ghānaṃ dukkhaṃ … jivhā dukkhā … kāyo dukkho … mano dukkho. Yaṃ dukkhaṃ tadanattā; yadanattā taṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Evaṃ passaṃ … pe … nāparaṃ itthattāyāti pajānātī”ti.
Dutiyaṃ.