Saṃyutta Nikāya 37
3. Balavagga
VAR: 33. Pañcasīlavisāradasutta → visāradavāsasuttaṃ (bj) | visārado (pts1)
33. Pañcasīlavisāradasutta
“Pañcahi, bhikkhave, dhammehi samannāgato mātugāmo visārado agāraṃ ajjhāvasati. Katamehi pañcahi? Pāṇātipātā paṭivirato ca hoti, adinnādānā paṭivirato ca hoti, kāmesumicchācārā paṭivirato ca hoti, musāvādā paṭivirato ca hoti, surāmerayamajjappamādaṭṭhānā paṭivirato ca hoti— imehi kho, bhikkhave, pañcahi dhammehi samannāgato mātugāmo visārado agāraṃ ajjhāvasatī”ti.
Navamaṃ.