Saṃyutta Nikāya 45
1. Avijjāvagga
VAR: 7. Dutiyaaññatarabhikkhusutta → dutiyabhikkhusuttaṃ (bj) | aññataro bhikkhu 2 (pts1)
7. Dutiyaaññatarabhikkhusutta
Sāvatthinidānaṃ. Atha kho aññataro bhikkhu yena bhagavā tenupasaṅkami … pe … ekamantaṃ nisinno kho so bhikkhu bhagavantaṃ etadavoca:
“‘Rāgavinayo dosavinayo mohavinayo’ti, bhante, vuccati. Kissa nu kho etaṃ, bhante, adhivacanaṃ: ‘rāgavinayo dosavinayo mohavinayo’”ti? “Nibbānadhātuyā kho etaṃ, bhikkhu, adhivacanaṃ: ‘rāgavinayo dosavinayo mohavinayo’ti. Āsavānaṃ khayo tena vuccatī”ti.
Evaṃ vutte, so bhikkhu bhagavantaṃ etadavoca: “‘amataṃ, amatan’ti, bhante, vuccati. Katamaṃ nu kho, bhante, amataṃ, katamo amatagāmimaggo”ti? “Yo kho, bhikkhu, rāgakkhayo dosakkhayo mohakkhayo— idaṃ vuccati amataṃ. Ayameva ariyo aṭṭhaṅgiko maggo amatagāmimaggo, seyyathidaṃ— sammādiṭṭhi … pe … sammāsamādhī”ti.
Sattamaṃ.