Saṃyutta Nikāya 55
VAR: 2. Rājakārāmavagga → sahassa or rājakārāmavaggo (pts1)
2. Rājakārāmavagga
VAR: 11. Sahassabhikkhunisaṅghasutta → sahassasuttaṃ (bj) | sahassa (pts1)
11. Sahassabhikkhunisaṅghasutta
Ekaṃ samayaṃ bhagavā sāvatthiyaṃ viharati rājakārāme.
VAR: sahassabhikkhunisaṃgho → sahassaṃ bhikkhunīsaṃgho (bj) | sahassabhikkhunīsaṅgho (s1-3)
Atha kho sahassabhikkhunisaṃgho yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho tā bhikkhuniyo bhagavā etadavoca:
“Catūhi kho, bhikkhuniyo, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo. Katamehi catūhi? Idha, bhikkhuniyo, ariyasāvako buddhe aveccappasādena samannāgato hoti— itipi so bhagavā … pe … satthā devamanussānaṃ buddho bhagavāti. Dhamme … pe … saṅghe … pe … ariyakantehi sīlehi samannāgato hoti, akhaṇḍehi … pe … samādhisaṃvattanikehi. Imehi kho, bhikkhuniyo, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo”ti.
Paṭhamaṃ.