Ekaṃ samayaṃ aññataro vajjiputtako bhikkhu vesāliyaṃ viharati aññatarasmiṃ vanasaṇḍe. Tena kho pana samayena vesāliyaṃ vajjiputtako sabbaratticāro hoti. Atha kho so bhikkhu vesāliyā tūriyatāḷitavāditanigghosasaddaṃ sutvā paridevamāno tāyaṃ velāyaṃ imaṃ gāthaṃ abhāsi:

“Ekakā mayaṃ araññe viharāma,

VAR: Apaviddhaṃva → apaviṭṭhaṃva (s1-3, km)

Apaviddhaṃva vanasmiṃ dārukaṃ;
Etādisikāya rattiyā,

VAR: nāmamhehi → nāma amhehi (bj, pts1-2)

Ko su nāmamhehi pāpiyo”ti.

Atha kho yā tasmiṃ vanasaṇḍe adhivatthā devatā tassa bhikkhuno anukampikā atthakāmā taṃ bhikkhuṃ saṃvejetukāmā yena so bhikkhu tenupasaṅkami; upasaṅkamitvā taṃ bhikkhuṃ gāthāya ajjhabhāsi:

“Ekakova tvaṃ araññe viharasi,
Apaviddhaṃva vanasmiṃ dārukaṃ;
Tassa te bahukā pihayanti,
Nerayikā viya saggagāminan”ti.

Atha kho so bhikkhu tāya devatāya saṃvejito saṃvegamāpādīti.